Obligación de pago de azúcar por deudas

Carta obligaçion de Diego Fernandes contra Lope Fernandes Sepan quantos esta carta vieren como yo Lope Hernandes vecino e regidor que so desta isla de Tenerife otorgo e conosco por esta presente carta que devo dar e pagar a vos Diego Hernandes mesonero vecino otrosy desta dicha ysla de Tenerife que soys presente o a quien por vos las oviere de aver e recabdar e esta carta por vos mostrare e vuestro poder para ello oviere conviene a saber çiento e quarenta e quatro arrobas de açucar e dos terçias de açucar bueno blanco lealdado tal que se an de tomar e tomar entre mercaderes las quales son por razon que me las pagastes en dyneros de contado en esta manera en diez e ocho mill maravedis que yo vos devia por razon de vnas casas que de vos resçeby conpradas en el dicho preçio de que me otorgastes carta de venta antel escribano publico yusoescripto e no enbargante que en la dicha carta de venta vos distes por contento y pagado de los dichos maravedis la verdad es que vos los devo e vos los tengo de pagar en el dicho açucar e todos los maravedis de mas para cunplimiento de las dichas çiento e quarenta e quatro arrobas de açucar e dos terçias me los distes e pagastes en dyneros de contado segund dicho es que fueron todos los dishos maravedis tantos que sumaron e montaron el dicho açucar de los quales me do e otorgo e tengo de vos por bien contento pagado e entregado a toda mi voluntad por quanto los resçibi de vos e pasaron de vuestro poder al mio bien e realmente e con efeto de que e e a esto en espeçial renunçio la querella e esebçion de los dos años que ponen las leyes en derecho e en razon de la pecunia e de la cosa no vista ni dada ni mirada ni resçebida ni pagada e me obligo e prometo de vos dar e pagar las dichas çiento e quarenta e quatro arrobas de açucar dos terçios en fin del mes de setyenbre primero que verna deste presente año en que estamos de la fecha desta carta puesto e pagado en el yngenio de Guymar e sy antes vos diere e pagare el dicho açucar que seays obligado vos el dicho Diego Hernandes a lo resçibyr en qualquier otro yngenio de la ysla en paz e syn pleito e syn contienda alguna so pena que sy al dicho plazo no vos diere e pagare el dicho açucar en la manera que dicha es que vos lo de peche e pague en pena con el doblo demas de os pagar por cada vn dia que pasado el dicho plazo de la paga fincare por os pagar todo el dicho açucar segund que de suso so obligado medya dobla de oro todo esto por pena e por postura e por pura promisyon firme e valedera